Պայթուցիկ սարք է աշխատել. Վլադիմիր Գասպարյանը հաստատեց

Րոպեներ առաջ ՀՀ ոստիկանապետ Վլադիմիր Գասպարյանը դեպքի վայրում աշխատող լրագրողներին հայտնել է, որ ավտոբուսի պայթյունը եղել է ալիքային, սա նշանակում է՝ պայթուցիկ սարք է աշխատել: «Պայթուցիկ սարքը, ամենայն հավանականությամբ, դրված է եղել նստարաններից մեկի տակ, կամ եղել է ուղևորներից մեկի մոտ»: Վլադիմիր Գասպարյանը հայտնել է նաեւ, որ տարածքի սյուների վրա աշխատող տեսախցիկներից մեկը ֆիքսել է պայթյունի պահը, բայց տեսագրության վրա հիմնվելով` դեռ վերջնական վարկած հայտնել հնարավոր չէ: «Ոչ մի բան հերքել կամ հաստատել չեմ կարող, ամեն վայրկյան ինֆորմացիան կարող է փոխվել: Միայն հաստատ է, որ պայթյունը կապված չէ ոչ գազի, ոչ վառելիքի, ոչ անսարքության հետ»,-նշել է ոստիկանապետը: Ի դեպ, նախագահը հանձնարարել է ոստիկանությանը ուժեղացնել պարեկապահակային ծառայությունը:

Նշենք, որ Նոր Նորքի 9-րդ զանգվածից 15-րդ թաղամաս տանող 63 համարի ավտոբուսը պատկանում է «Քինգ դե լյուքս» ընկերությանը: Ավտոբուսը, որում պայթյուն է եղել, 2007թ արտադրության է, գազի բալոն չի ունեցել, աշխատել է դիզելային վառելիքով, ինչը, սակայն, չէր կարող այդպես պայթեր: Հենց այս հանգամանքն էլ բազմաթիվ վարկածներ է առաջացնում, այդ թվում` ահաբեկչության տարբերակ:

Հիշեցնենք, որ Հալաբյան փողոցում` ավտոբուսում, պայթյուն է եղել, որի հետեւանքով զոհվել է մեկ, վիրավորվել 6 հոգի: «Արմենիա» հանրապետական բժշկական կենտրոն տեղափոխված տուժածներից 3-ը կին է, 3-ը տղամարդ: Այս պահին երկուսի՝ 14 և 15 տարեկան պատանիների առողջական վիճակն է գնահատվում ծանր, նրանց վիրահատությունն ավարտվել է, տղաները տեղափոխվել են վերակենդանացման բաժանմունք, վիրահատությունները հաջող են անցել, 2-ի կյանքին էլ վտանգ չի սպառնում: Տուժածներից մեկը հղի կին է, որն անցել համակարգչային տոմոգրաֆիա, կատարվել են այլ անհրաժեշտ հետազոտություններ, կնոջ և պտղի կյանքին որևէ վտանգ չի սպառնում։ Տուժածները հիմնականում ստացել են բեկորային՝ տարբեր աստիճանի մարմնական վնասվածքներ։

Աղբյուրը` http://pressmedia.am/?p=21800&l=am