Մոգերինին ողջունեց Հայաստանում անցկացված բարեփոխումները. Վահրամ Բաղդասարյան
ԱԺ ՀՀԿ եւ ՀՅԴ խմբակցությունները Եվրոպական միության արտաքին գործերի եւ անվտանգության քաղաքականության բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինիի հետ քննարկել են ղարաբաղյան հարցին, սահմանադրական փոփոխություններին, ընտրական օրենսգրքին եւ Հայաստան-ԵՄ հարաբերություններին վերաբերող հարցեր: Այս մասին այսօր՝ մարտի 1-ին, ԱԺ-ում Մոգերինիի հետ հանդիպումից հետո լրագրողներին ասաց ԱԺ ՀՀԿ խմբակցության ղեկավար Վահրամ Բաղդասարյանը:
«Մոգերինին եւ իր պատվիրակությունը ողջունեցին Հայաստանում անցկացված բարեփոխումները, իսկ ընտրական օրենսգրքի մասին իրենց կարծիքը կհայտնեն առաջիկայում»,- ասաց Վահրամ Բաղդասարյանը՝ նշելով, որ ընտրակեղծիքների հետ կապված որեւէ հարց չի քննարկվել:
Վահրամ Բաղդասարյանը նշեց, որ երկու կողմերը շահագրգռվածություն են հայտնել, որ Հայաստան-ԵՄ համաձայնագրի շուրջ գործընթացն արագացվի եւ առաջիկայում արդյունքներ լինեն:
Նշենք, որ Մոգերինին այս պահին հանդիպում է մյուս խմբակցությունների հետ ՝ Ժառանգություն, ՕԵԿ, ՀԱԿ, ԲՀԿ:
Հիշեցնենք, որ Ֆեդերիկա Մոգերինին Հայաստանում է մեկօրյա այցով: Մինչ այս նա եղել է Բաքվում:
