Գագիկ Բեգլարյանը Կոտայքի մարզում ծանոթացել է հիմնանորոգված ճանապարհների վիճակին

13:41 — 12/Դեկտեմբեր/2015
Գագիկ Բեգլարյանը Կոտայքի մարզում ծանոթացել է հիմնանորոգված ճանապարհների վիճակին

ՀՀ տրանսպորտի և կապի նախարար Գագիկ Բեգլարյանը այցելել է Կոտայքի մարզի Աբովյան-Նոր Գեղի-Եղվարդ-Աշտարակ հիմնանորոգված ճանապարհահատված, ծանոթացել կատարված աշխատանքներին: Համաշխարհային բանկի «Կենսական նշանակության ճանապարհացանցի բարելավում» վարկային ծրագրով 2015 թվականի մարտից մեկնարկել էին 12 կմ երկարությամբ ճանապարհի հիմնանորոգման աշխատանքները: Երկու տարվա համար նախատեսված աշխատանքը «Կապավոր» ճանապարհաշինական ընկերությունը կատարել է 7-ամսում:
Ինչպես տեղեկացրին ՀՀ տրանսպորտի և կապի նախարարության լրատվական ծառայությունից, ճանապարհի վերակառուցման ընթացքում շինարարները հիմքից փոխել են ճանապարհի հողային պաստառն ու երթևեկելի մասի պատվածքը, վերականգնվել են ջրահեռացման համակարգերն ու մայթերը: Գյուղտեխնիկայի անցումների համար ճանապարհի որոշ հատվածներում տեղադրվել են երկաթբետոնե սալեր: Հիմնանորոգվել է նաև Նոր Գե ղիի դպրոց տանող ճանապարհը:
Համայնքի ղեկավարի խոսքով՝ նորոգված ճանապարհ ունենալու երազանք գյուղացիները վաղուց ունեին և այս տարի, Ամանորի նախաշեմին՝ սա իսկական նվեր էր համայնքի բնակիչներին: «Մենք երկար ժամանակ երազում էինք, որ
ճանապարհը նորոգվի, և ի վերջո դա իրագործվեց: Մենք բարձր ենք գնահատում կատարված աշխատանքը և Նոր Գեղիի բնակչության անունից հատուկ շնորհակալագիր ենք հանձնել նախարարին»,- նշել է Նոր Գեղի համայնքի ղեկավար Ֆրոնտիկ Թևոսյանը։

Գագիկ Բեգլարյանին շնորհակալագրեր են հանձնել նաև Կոտայքի մարզի Արգել և Կարենիս համայնքների ղեկավարները:
Համաշխարհային բանկի տրամադրած վարկային միջոցներով հիմնանորոգվել է նաև Արգել-Կարենիս-Չարենցավան 5.3 կմ երկարությամբ ճանապարհը։ Հիմքից կառուցված նոր ասֆալտապատ ճանապարհին զուգահեռ ճանապարհի ոլորանների
հատվածում վերականգնվել են հենապատերը, նորոգվել են 2 կամուրջները։ Վերականգնված հատվածն անցնում է Արգելի հիդրոէլեկտրակայանով: Ասֆալտապատվել է նաև Արգել համայնքի եկեղեցի տանող ճանապարհը:

Համայնքի ղեկավարը նշել է, որ այս ճանապարհահատվածը վերակառուցելու խոստումը տրվել է Հայաստանի Հանրապետության Նախագահ Սերժ Սարգսյանի կողմից 2013 թվականին բնակիչների հետ հանդիպման ժամանակ: Երկու տարի անց ճանապարհն արդեն հանձնվել է շահագործման: «Հայաստանի Հանրապետության Նախագահ պարոն Սերժ Սարգսյանը մեզ խոստացավ, որ ճանապարհն անպայման կկառուցվի, և ինքն այսօր իր խոսքի տերն է։ Շատ
շնորհակալ ենք Նախագահին, որ այսպիսի գեղեցիկ, որակով ճանապարհ նվիրեց մեր գյուղերին: Արգելը Չարենցավանին կապող այս միակ ճանապարհը ռազմավարական նշանակություն ունեցող ճանապարհ է: Գյուղացին իր բերքը 10 կմ հեռավորությամբ գտնվող Չարենցավանը թողած, գնում էր Երևան, քանի որ չէր կարողանում հին ճանապարհով անցնել»,- ասել է Արգել համայնքի գյուղապետ Մաթևոս Ավագյանը:

ՀՀ տրանսպորտի և կապի նախարար Գագիկ Բեգլարյանը լրագրողների հետ զրույցում նշել է, որ անցնող տարում նախարարությունը Համաշխարհային բանկի վարկային միջոցներով և ՀՀ պետական բյուջեի տրամադրած գումարներով ամբողջ հանրապետությունում վերակառուցել և հիմնանորոգել է շուրջ 178 կմ ընդհանուր
երկարությամբ ճանապարհներ:

«Համաշխարհային բանկի «Կենսական նշանակության ճանապարհների բարելավում» ծրագրով 2015-2016 թվականներին մենք պետք է կառուցեինք, հիմնանորոգեինք մոտ 135 կմ ճանապարհ։ Այս տարի մենք աշխատանքների 90 տոկոսն ավարտել ենք։ 2016-ին կառուցելու համար մնացել է 10-ը կմ: Բացի դրանից, մենք բյուջեի հատկացումներով ունենք 45 կմ, որի շինարարությունը լրիվ ավարտել ենք: Այս տարի, կարող ենք ասել, որ Հայաստանի Հանրապետությունում կառուցել ենք 170-178 կմ ճանապարհ»,- ասել է ՀՀ տրանսպորտի և կապի նախարար Գագիկ Բեգլարյանը։

Ճանապարհները կառուցվել են բարձր որակով. թե լաբորատոր քննությունները, թե որակի տեխհսկողություն իրականացնող ընկերության մասնագետները, թե շինարարները վստահեցնում են՝ հիմնանորոգված ճանապարհները երկար կծառայեն:
Ի դեպ, դրանք կառուցվել են ճանապարհաշինական նոր տեխնոլոգիաներով, նորարարական մոտեցումներով:

«Կոկս կոնսալտ» ընկերության տեխնիկական հսկողության խմբի ղեկավար Կնուդ Մյուլերը նշել է. «Որպես շինաշխատանքների որակը վերահսկող ընկերության ներկայացուցիչ` ես հպարտ եմ, որ մենք էլ մի մասն ենք որակյալ այս աշխատանքի: Նման աշխատանքի ապահովման համար թե’ աշխատանքների պատվիրատուն, թե’ շինարարը, թե’ տեխհսկողները պետք է աշխատեին մեկ ընտանիքի նման. մեզ դա հաջողվել է: Այս տարվա ընթացքում նման որակյալ ճանապարհներ կառուցվել են նաև Հայաստանի այլ բնակավայրերում ևս, ինչի համար ես շատ ուրախ եմ»:

Իսկ ՀՀ տրանսպորտի և կապի նախարար Գագիկ Բեգլարյանը նշել է. «Որակը, ինքներս էլ տեսնում ենք, ապահովել ենք` շատ կարևոր որակ, որի համար ես շինարարներին ուզում եմ շնորհակալություն հայտնել: Անընդհատ, ինչպես այլ ոլորտներում, մեր ոլորտում ևս կան զարգացումներ, նորամուծություններ, նոր տեխնոլոգիաներ, ինչու չէ՝ նաև նոր տեխնիկա»:

Համայնքային նշանակության ճանապարհների հիմնանորոգման աշխատանքները հաջորդ տարիներին ևս կշարունակվեն: Այս տարվա նոյեմբերին Համաշխարհային բանկն ու ՀՀ կառավարությունն ստորագրեցին 40 մլն դոլարի վարկային համաձայնագիր, որը 10 մլն դոլարով կհամաֆինանսավորվի ՀՀ պետական բյուջեից: Դրանով նախատեսվում է «Կենսական նշանակության ճանապարհացանցի բարելավում ծրագրի» երկարաձգում՝ մինչև 2019 թվականի ավարտը:

Աղբյուրը` http://nyut.am/