Զինված խմբի գործով կալանավորված ազատամարտիկ Աղասի Մարտիրոսյանը 2 օր է հացադուլ է հայտարարել
«Նուբարաշեն» ՔԿՀ-ում գտնվող ԱԱԾ կողմից վնասազերծված «զինված խմբի» գործով կալանավորված ազատամարտիկ Աղասի Մարտիրոսյանը փետրվարի 15-ից հացադուլ է հայտարարել: Այս մասին այսօր՝ փետրվարի 17-ին, NEWS.am-ը տեղեկացավ ԱՆ ՔԿՎ մամուլի ծառայությունից:
Աղասի Մարտիրոսյանն իրեն առաջադրված մեղադրանքը չի ընդունում եւ այդ պատճառով է հացադուլ հայտարարել, նա հրաժարվում է ցուցմունք տալ:
Նշենք, որ Աղասի Մարտիրոսյանի կալանքը որպես խափանման միջոց երկրորդ անգամ երկարաձգվել է փետրվարի 5-ին: Մարտիրոսյանը բողոքարկել է դատարանի որոշումը:
Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, այն է՝ Հանցավոր համագործակցություն ստեղծելը եւ դրան մասնակցել եւ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
